බෝමලුව හෙළගම – ආදිවාසී ගම්මානය

මෙහි වැසියෝ විශේෂයෙන් උඩු කය වසන්නේ නැත. එය අපේ පැරණි හෙළ ක්‍රමයයි. ඉනෙන් පහලට අඳින්නේත් අපේ මුතුන් මිත්තන් අතීතයේ ඇඳි පරිදි වන ඉතා පහසු කපු ඇදුම් කඩකි. කුඹුරට බසින්නේත් සහ හේනට යන්නෙත් අමුඩය ගසාගෙනය.

අපේ ‘බෝමළුව ගමේ’ පුද්ගලිකව කිසිදු ඉඩමක් හෝ දේපොලක් අයිති නොවන අතර, සියලු ඉඩම් සහ දේපොළ ඇත්තේ පොදු අයිතිය යටතේය. ගෙවල් තැනීම සඳහා වෙන් කොට ඇති භූමි වල තමන්ට කැමති තැනක ගෙයක් සාදාගෙන ජීවත් විය හැක. අපට ඔප්පුව නැමති කොල කැබැල්ලකින් ඉඩමකට පවතින සම්මත නෛතික රාමුවෙන් අයිතියක් තිබුනත්, අප සලකන්නේ මේ භුමිය අපට මෙන්ම මෙහි වසන වන සතුන්ට, කෘමීන්ට, කුරුල්ලන්ට, මී මැස්සන්ට, බඹරුන්ට යනාදී සියලු සතුන්ට සමානව අයිති බවය. මේ භූමියට වගේම මෙහි හැදෙන බව භෝග වලටද අපට ඇති අයිතියම, අලි ඇතුන්ට, කුරුල්ලන්ට, වන සතුන්ට, කෘමීන්ට, වේයන්ට, කූඹින්ට යනාදී සියලු සතුන්ට ඇති බවය. මෙය අපට මෙන්ම සියලු සතුන්ට අහාර සපයන තෝතැන්නක්ය.

මෙහි තැනෙන සියලු ගොඩනැගිලි ඉදිවන්නේ ස්වභාවධර්මයට ඉක්මනින් අවශෝෂනය වන ද්‍රවයන්ගෙන් පමණි. ඒ අනුව මෙහි සියලු ගෙවල් සහ ගොඩනැගිලි තනන්නේ මැටියෙන් සහ දැව වලින් පමණි. වහල වලට පොල්අතු, පිදුරු, ඉලුක් පමණක් භාවිතා කරනු ලැබේ. සියලු ගෘහ භාණ්ඩ නිමවන්නේ දැව වලින් පමණි. කිසිදු ප්ලාස්ටික් ගෘහ භාණ්ඩ හෝ ගෘහ උපකරණ කිසිවක් භාවිතා කරන්නේ නැත. අවම විදුලි අවශ්‍යතාවය සපුරා ගන්නේ සූර්ය බල ශක්තියෙන් පමණි.

මෙහි ගොවිතැන් කරන්නේ පාරම්පරික හෙළ ක්‍රමවේදයන් අනුගමනය කරමින්ය. ඒ වගේම මෙහි භාවිතා කරන්නේ පාරම්පරික වී, එළවළු, පලතුරු සහ භෝග පමණක්ය. ඒ සඳහා රට පුරා වනාන්තර වල ගොස්, දෙමුහුන් නොවූ පාරම්පරික බීජ සොයා ගැනීමත් ඉන්පසුව ඉදිරි කන්න සඳහා ඒවා අප ගමේම නිෂ්පාදනය කිරීමත් මෙහි වෙසෙන වැසියන් විසින් සාමුහිකව කරන්නට නියමිතය. රසායනික පොහොර හෝ වෙනත් කිසිදු කෘමිනාශක, වල් නාශක යනාදී කිසිදු රසායනික යෙදවුම් කිසිවක් මේ ගමේ භාවිතා කරන්නේ නැත. කිසිදු ගොවිතැන් කටයුත්තකට ඉන්ධන භාවිතයෙන් වැඩ කරන කිසිදු නවීන යන්ත්‍රෝපකරනයක් භාවිතා කරන්නනේද නැත. කුඹුරු සී සෑම, කමතේ කොළ පෑගීම යනාදිය සඳහා යොදා ගන්නේත් අපේ පැරණි ක්‍රමයට අම්බරුවන් පමණකි. ගොවියෝ කුඹුරට බසින්නේ අමුඩය ගසා ගෙනය. කොට කලිසම්, ටී ෂර්ට්, තොප්පි, අව් කන්නාඩි මෙහි ගොවියෝ භාවිතා නොකරති.

මෙහි පාරම්පරික හෙළ ක්‍රමයට, එනම් කන්නෙට, කරනෙට, කයියට ගොවිතැන් බත් කරන්න හැකි, ඒ පිළිබද හොඳ දැනුමක් ඇති හෙළ ගමරාල කෙනෙකු සහ ගම මහගේ කෙනෙකු මේ හෙළ ගොවිතැන මෙහෙයවන්නට නියමිතය. ගොවිතැන පටන් ගන්නට පෙර වල් නාශක සහ රසායනික පොහොර යෙදවුම් නිසා විනාශ වී ඇති ක්ෂුද්‍ර ජීවින් නැවත පොළොවේ ඇති කිරීම. කෘමින් නැවත ගෙන්වා ගැනීම සඳහා අවශ්‍ය නව දළු ශාඛ රෝපණය, සහ රසායනික යෙදවුම් නිසාම වැව්, අමුණු, ඇල දොළ වල යනාදී ස්වභාවික ජල මුලාශ්‍ර වල ඇති විෂ සහ බැර ලෝහ යනාදිය පෙරනය කර ගැනීම සඳහා ඉහත විෂ සහ බැර ලෝහ පෙරන ජලජ ශාඛ ජල මුලාශ්‍ර වල වගා කිරීම යනාදී සියලු කාර්යන් සිදු කිරීමට නියමිතය. තරුණ පිරිසට ඒ ගම පවුලෙන් හෙළ ගොවිතැනත්, හෙළ සිරිත් විරිත් සහ ඉහත සඳහන් රසායනික යෙදවුම් නිසා විෂ වී රෝගී වී ඇති මහ පොලොව සුවපත් කිරීමේ ක්‍රමවේද ඉගෙන ගැනීමට ඉඩ ප්‍රස්තාව ලබාදීමත් මෙහි ප්‍රධාන අරමුණක් වේ.

මෙහි වෙළඳපොලක් නොමැත, වෙළඳපොළ ආර්ථිකය පිටු දකින බෝමළුව ගමේ ගොවිතැනෙන් ලැබෙන කිසිදු අස්වැන්නක් මුදලට නොවිකුනනු ලබයි. ගමේ වැසියන්ගේ පරිභෝජනයෙන් සහ ඉදිරියේදී ඉදි කිරීමට නියමිත 365 දවසේ ක්‍රියාත්මක වන දන්සලේ පරිභෝජනයට වඩා වැඩිවන සියලු එළවලු සහ පලතුරු ගමේ වැසියන්ට නොමිලයේ බෙදා දීම අපේ පරමාර්ථයයි. කැමති අයට එවැනි දේ නොමිලයේ ගෙන යාමට හැකිවන පරිදි ඒවා තැබිය හැකි විකුණන මුදලාලි කෙනෙක් නැති කුඩා කඩ පිලක් ඉදිරියේදී ගමේ කොනක ස්ථාපිත කිරීමට නියමිතය.

“තුන්සිය හැටපස් දවසේ පැවැත්වෙන දන්සැල” මේ පුණ්‍ය භුමියේ පවත්වන තවත් විශේෂ සේවාවකි. මෙය මේ ස්ථානයට පැමිණෙන භාවනා යෝගින්ට, ප්‍රදේශයේ ගැමියන් ඇතුළු සියලු දරුවන් යනාදී ඕනෑම අයකුට උදේ සහ දවල් අහාරය දිනපතා දන් දෙන, වසරේ 365 දවසේම නොකඩවා පවත්වන දන්සැලකි. කුස ගින්න ඇති ඕනෑම ගැමියකුට, හෝ ගමේ දරුවකුට මෙන්ම මේ ස්ථානය වන්දනා මාන කරන්නට පැමිණෙන සියලු දෙනාටම ජාති, ආගම්. කුල මල යනාදී කිසිදු බේදයකින් තොරව මේ දන්සැලෙන් තම කුස ගින්න නිවා ගැනීමට හැක.

මෙහි සැකසෙන සියලු අහාර සම්පුර්ණයෙන්ම එළවලු ශාඛ කොටස්වලින් පමණක් භාවිතා කෙරේ. තවද මෙහි තේ, කෝපි වැනි දේ භවිතා නොකරන අතර ඒ වෙනුවට බෙලිමල්, රණවරා වැනි දේශීය පාන පමණක් භාවිතා කරනු ලබයි.

මේ දන්සැල පවත්වා ගෙන යාම සඳහා දිනකට රුපියල් 25000, පමණ වැය වේ. කෙනෙකුගේ කුස ගින්න නිවන මේ මහා සත් කාර්යයට දායක වීමට කැමති ඕනෑම අයකුට දිනක් හෝ දින කීපයක් වෙන්කරගෙන මේ මහා කුසල කර්මයට දායක විය හැක. විදේශ රටවල සිටින අයටද මේ මහා පින්කමට දායක විය හැක.

මෙවැනි ගමක් ඇති කිරීමේ අරමුණ කෘමිනාශක, වල් නාශක, රසායනික පොහොර සහ අනෙකුත් රසායනික යෙදවූම් නිසා විනාශ වී ඇති මහ පොලොව සුවපත් කර ස්වභාවික ජාල මුලාශ්‍ර නැවත ප්‍රකෘති තත්වයට පත් කිරීමයි.

මෙම ගමේ මූලික අරමුණ වන්නේ අපේ ජීවත් වීම නිසා ස්වභාවික පරිසරයට වන හානිය අවම වන ලෙස සොබාදහමේ අවම සම්පත් ප්‍රමාණයක් පමණක් පරිභෝජනයට ගනිමින් කාබන් සෘණ (Carbon Negative) ජීවතයක් ගත කිරීමය. ඒ නිසා ගහ කොළ කැපීම, පරිසරයට ප්ලාස්ටික් සහ පොලිතින් මුදා හැරීම අනවශ්‍ය ලෙස පරිසරයේ අවට ගිනි දැල්වීම මෙහි නොකෙරේ.

ප්‍රදේශයට ආවේණික වන පැල රෝපණය මෙන්ම, වනයේ වෙසෙන වන අලින් සහ වන සතුන් අහාරයට ගන්නා ශාඛ වනගත ප්‍රදේශ වල වැවීම සහ වන අලින්ට අහාර සඳහා පොල් අතු, කිතුල් කොට වැනි දේ වනයට ගෙන ගොස් දැමීමටද අප විසින් වැඩ පිළිවෙලක් සැලසුම් කොට ඇත. තවද නියං කාලයට වන සතුන්ට පහසුවෙන් ජලය පානය කිරීම සඳහා වන මැද කුඩා විල් ඉදිකිරීම, නියං කාලයේ ඒ පිලිබඳව සොයා බලා ඒවාට අවශ්‍ය ජලය නල ළිඳක් මගින් හෝ සැපයීම යනාදී දේ ඉටු කිරීමටද අප විසින් සැලසුම් යොදා ඇත.

මෙම ගමේ විදුලි අවශ්‍යතාවය සපයාගන්නේ සුර්ය බල ශක්තියෙන්ය. අහාර පිසීම කරන්නේ දර වලින් සහ බයෝ ගෑස්වලින් පමණි. බොහෝ කුටි වල රාත්‍රියේ පන්දම් ලන්තෑරුම් යනාදියෙන් ආලෝකය සපයා ගැනීම කිරීමට සැලසුම් කර ඇත.

1. සතුන් මැරීම, සත්ව හිංසනය සහ සතුන් බිය කිරීම.
2. ප්ලාස්ටික් සහ පොලිතීන් භාවිතය සහ ගම තුලට ගෙන ඒම.
3. දෙමුහුන් වී සහ බීජ වර්ග රෝපණය.
4. රසායනික පොහොර, කෘමිනාශක සහ වල්නාශක භාවිතය.
5. මත් පැන් සහ හෙරොයින් වැනි මත් ද්‍රව්‍ය භාවිතය – (මෙම තහනමට කංසා ඇතුලත් නොවේ).
6. මස් මාලු වැනි මාංශ අහාර පිසීම සහ භාවිතය.
7. කැලෑ සහ ගහ කොල ගිනි තැබීම.